Преподобная Феодора Нижегородская, в миру Анастасия (Васса), дочь тверского боярина Иоанна и его супруги Анны, родилась в 1331 году. В 12 лет ее выдали замуж за нижегородского князя Андрея Константиновича. После 12 лет бездетной супружеской жизни, князь скончался, приняв монашество (+ 2 июня 1365). Святая княгиня прожила в миру еще 4 года, а затем даровала свободу всем слугам, раздала имущество и поступила в Нижегородский Зачатьевский монастырь. Ее постригал святой Дионисий, впоследствии архиепископ Суздальский (+ 1385, память 15 октября и 26 июня). В иночестве святая часто пребывала без пищи день, два, а иногда и пять; ночи проводила в слезных молитвах, на теле носила власяницу. Она стяжала дар смирения и любви и все оскорбления переносила незлобиво. Пример строгой жизни преподобной Феодоры увлекал и других: в ее общежительной обители постригались княгини и боярыни, всего было около 100 сестер. Преподобная Феодора скончалась в 1378 году. Подвигами и трудами преподобной Феодорой Нижегородской, был заложен мощный фундамент, в основание Крестовоздвиженской женской обители.
Служба преподобныя матере нашея Феодоры Нижеградския
На вечерне
На Господи воззвах стихиры святыя, глас 8:
Господи, Господь наш,/ яко чудно имя Твое по всей земли,/ Прославльшаго святыя Своя,/ в нихже Феодора преподобная ныне почитается,/ яко Тверския земли честное прозябение/ и Нижняго Нова града украшение,/ к нейже припадающе молимся,/ да избавит люди, память ея творящия,// от всякия беды и печали.
Приидите верных собори,/ песнь ныне духовную принесем Феодоре,/ житие на земли ангельски скончавшей/ Престолу Царя Небеснаго предстоящей/ и молящейся избавитися граду нашему от враг видимых и невидимых,/ даровати земли плодоносие,/ всем же чтущим ея память – спастися// и избавитися от всякия беды и печали.
Днесь Нижний Новый град светло украшается,/ имея себе молитвенницу и предстательницу,/ Феодору достохвальную,/ яже в посте и молитве многащи пребывши,/ обители райския достиже/ и тамо купно со всеми святыми водворися,/ к нейже припадающе молимся,/ да избавит люди, память ея творящия,// от всякия беды и печали.
Ины стихиры, глас 3:
Преподобне отче Серафиме,/ прииди стани с нами,/ память матере нашея Феодоры творящими,/ да ликует с нами и все ангел множество,/ днесь бо земный ангел и небесный человек прославляется:// радуйтеся людие Российстии.
Жен Дивеевских сословие,/ ныне духовно торжествуйте,/ в память преподобныя Феодоры/ во обители ея невидимо совокупльшеся,/ подвиги и молитвы матере нашея да поются верными:// имеют бо теплую молитвенницу о душах к Богу.
Нижеградская земле, ныне благоукрасися,/ людие ея светло торжествуйте,/ имеюще убо молитвенницу теплую,/ яко крин красный зде просиявшую,/ ластовицу изящную/ воспойте Феодору богомудрую,/ князей российских честное украшение// и всех верных удобрение.
Слава, глас 2:
Подвиги и молитвы,/ бдение и пощение в житии возлюбльши,/ Феодора чудная, ныне прославляется,/ к нейже припадающе, людие, помолимся,/ избавитися нам от враг видимых и невидимых// и сыновом Российским спастися.
И ныне: Богородичен воскресный: Прейде сень:
Таже вход. Прокимен дне и чтения 3:
Премудрости Соломони чтение.
Праведных души в руце Божией, и не прикоснется их мука./ Непщевани быша во очесех безумных умрети, и вменися озлобление исход их./ И еже от нас шествие сокрушение, они же суть в мире./ Ибо пред лицем человеческим, аще и муку приимут, упование их безсмертия исполнено./ И в мале наказани бывше, великими благодетельствовани будут:/ яко Бог искуси я, и обрете их достойны Себе./ Яко злато в горниле искуси их: и яко всеплодие жертвенное прият я./ И во время посещения их возсияют, и яко искры по стеблию потекут./ Судят языком и обладают людьми, и воцарится Господь в них во веки./ Надеющиися Нань разумеют истину, и вернии в любви пребудут Ему./ Яко благодать и милость в преподобных Его,/ и посещение во избранных Его.
Премудрости Соломони чтение.
Праведницы во веки живут, и в Господе мзда их, попечение их у Вышняго./ Сего ради приимут царствие благолепия, и венец доброты от руки Господни:/ зане десницею покрыет я, и мышцею защитит их./ Приимет всеоружие рвение Свое, и вооружит тварь в месть врагом./ Облечется в броня правды, и возложит шлем, суд нелицемерен./ Приимет щит непобедимый, преподобие:/ поострит же напрасный гнев оружие:/ споборет же с Ним мир на безумныя./ Пойдут праволучныя стрелы молниины,/ и яко от благокругла лука облаков, на намерение полетят./ И от каменометныя ярости, исполнь падут грады./ Вознегодует на них вода морская, реки же потопят я нагло./ Сопротив станет им дух силы,/ и яко вихор развеет их:/ и опустошит всю землю беззаконие, и злодейство превратит престолы сильных./ Слышите убо царие и разумейте, навыкните судии концев земли./ Внушите держащии множества, и гордящиися о народех язык./ Яко дана есть от Господа держава вам,/ и сила от Вышняго.
Премудрости Соломони чтение.
Праведник, аще постигнет скончатися, в покои будет./ Старость бо честна, не многолетна, ниже в числе лет исчитается./ Седина же есть мудрость человеком, и возраст старости – житие нескверное./ Благоугоден Богу быв, возлюблен бысть,/ и живый посреде грешник преставлен бысть./ Восхищен бысть, да не злоба изменит разума его, или лесть прельстит душу его./ Рачение бо злобы помрачает добрая, и парение похоти пременяет ум незлобив./ Скончався вмале, исполни лета долга,/ угодна бо бе Господу душа его,/ сего ради потщася от среды лукавствия./ Людие же видевше и не разумевше, ниже положше в помышлении таковое,/ яко благодать и милость в преподобных Его/ и посещение во избранных Его.
На литии стихира обители, таже Слава святыя, глас 5:
Подобен: Радуйся:
Радуйся днесь Русская земле,/ красуйся Богом спасаемый Нижний Новый град,/ имея себе твердое основание/ — святых сонм изрядный,/ в нихже Феодора достохвальная ныне прославляется/ яко щит веры и ограждение,/ постников честное продолжение,/ сирых и вдов попечительница,/ монашествующих правило,/ юже поюще возопиим:/ не забуди нас убогих,/ сотвори благомощную молитву ко Христу,// да сохранит люди Своя ненаветны.
И ныне Богородичен:
Радуйся Мати Невместимаго Бога,/ радуйся мосте и чертоже Царя,/ радуйся иноков утверждение,/ радуйся лествице Иаковля,/ Еюже сниде Бог,/ да спасет люди Своя// от всякия нужды и печали.
На стиховне стихиры, глас 6:
Сей светлый праздник,/ радуйтеся людие,/ воспойте славу Богу,/ даровавшему земли нашей таковую молитвенницу/ и святых жен честное украшение,// Феодору преподобную.
Стих: Честна пред Господем/ смерть преподобных Его.
Кто не удивится подвигом твоим,/ кто ли не воспоет болезни и труды твоя,/имиже трудилася еси мати святая,/ Феодора прехвальная?
Стих: Восхвалятся преподобнии во славе/ и возрадуются на ложах своих.
Вся красная мира сего ни во что же вменивши,/ житие ангельское паче всего возлюбила еси,/ и ныне нас веселия исполняеши,/ почитающих святую память твою,// Феодора приснопеваемая.
Слава, глас 1:
Подобен: О дивное чудо!
О дивное чудо!/ В земли нашей подвижница изящная является,/ супруг честное целомудрие,/ и иноков преславное украшение бывает./ Феодора славная,/ жен святых сожительнице,/ ангельских чинов собеседнице,/ Господеви молися:// даровати нам мир и велию милость.
И ныне, Богородичен:
На благословении хлебов тропарь святыя, глас 1:
Земли Тверския честное прозябение,/ князей Нижеградских преславное украшение,/ Феодору преподобную ныне восхвалим,// поюще житие ея равноангельное.
На утрени
По 1 стихословии седален, глас 4:
Явилася еси аки крин сельный в земли нашея, Феодора богомудрая,/ тину мирскаго жития оттрясши,/ ангельское житие измлада возлюбила еси,/ сего ради тя почитаем,/ яко молитвенницу теплую о душах наших.
Слава и ныне, Богородичен:
Спас и Избавитель мой/ из утробы Твоея, Чистая, пройде,/ сохрань тя яко купину огнем неопальну.
По 2 стихословии седален, глас 2:
Иноческаго жития правило/ и молитвы умныя делательницу усердную,/ восхваляем днесь, вернии, Феодору приснославную,/ молит бо о нас Превечнаго Бога,/ спастися душам нашим.
Слава и ныне, Богородичен:
Иже на Херувимех Седящаго/ и от Серафим песнословия Приемлющаго/ во чреве Твоем вместила еси, Неискусомужная Отроковице,/ Его же моли спасти и просветити/ Тя благочестно восхваляющия люди.
Таже полиелей и припев:
Ублажаем тя, преподобная мати наша Феодоро, и чтим святую память твою: ты бо молиши за нас Христа Бога нашего.
Псалом избранный преподобным.
По полиелеи седален, глас 7:
Звезду многосветлую небосклона Христова,/ восхваляем ныне вернии,/ песни и пении духовныя от сердца приносяще,/ любовь даровати молимся всем,/ творящим память Феодоры преподобныя.
Слава и ныне, Богородичен:
Яко нашего Спасителя Рождшую,/ восхваляем ныне Деву Пречистую,/ просяще даровати мир/ и спастися стаду Христову/ от всяких бед и искушений.
Степенна 1-й антифон 4 гласа. Таже прокимен, глас 4: Восхвалятся преподобнии во славе/ и возрадуются на ложах своих. Стих: Воспойте Господеви песнь нову, хваление Его в церкви преподобных. Евангелие от Матфея, зачало 43.
По 50-м псалме стихира, глас 6:
Днесь, вернии, духовно торжествующе/ и в память преподобныя матере Феодоры во обитель ея стекшеся,/ из глубины сердечныя воззовем:/ радуйся, князей Нижеградских похвало,/ радуйся, иноческаго жития правило,/ радуйся, словеса Христовы в житии своем явно воплотившая,// молися о душах наших.
Канон Пресвятыя Богородицы, глас 2 зри во Октоихе в субботу на повечерии: Во глубине постла иногда: Таже канон преподобныя, егоже краегранесие: Нижний Новград воспевает тя, Феодоро. Глас 8:
Песнь 1.
Ирмос: Воду прошед яко сушу,/ и египетскаго зла избежав,/ израильтянин вопияше:// Избавителю и Богу нашему поим.
Небеси и земли Творче, Боже мой,/ отверзи моя уста и научи мя воспети/ угодницу Твою, Феодору преподобную.
Источник Божественных сокровищ,/ Спас наш Христос, избра тя от пелен младенческих/ да прославиши имя Его,/ Феодоро славная.
Жития сего вся красная яко тщетная вменила еси, Феодоро чудная,/ и по времени во обители Пресвятыя Богородицы водворилася еси,/ да прославится Отец Небесный в подвизе твоем.
Богородичен: Небеси и земли Царица явилася еси, Дево,/ во чреве Твоем вместившая вездесущаго Бога,/ Егоже поюще, величаем.
Песнь 3.
Ирмос: Небеснаго круга Верхотворче Господи,/ и Церкве Зиждителю,/ Ты мене утверди в любви Твоей,/ желаний краю, верных Утверждение,// Едине Человеколюбче.
Имя Божие во уме никогдаже оставльши,/ любовию Христовою, украсилася еси, Феодоро богомудрая,/ ныне воспевающих тя в любви утверди,/ да вси едино будут.
Измлада вере Христовой навыкла еси, Феодоро славная,/ жития иноческаго возжелела еси,/ Промыслом же Божиим честнаго супружества образ явилася еси,/ темже ти зовем: ныне воспевающих тя в любви утверди,/ да вси едино будут.
Нижеградских князей украшение явися Феодора честная,/ аще и в Тверстей земли прозябла есть,/ обитель святую устрояет,/ в нейже вскоре водворится.
Богородичен: Одеваяй небо облаки,/ в плоть человечу из Тебе облечеся,/ темже всякий род поет Тя и глаголет:/ радуйся Богородице, Чистая Приснодево.
Седален, глас 8:
Молитвою житие украсися Феодоры Нижняго Нова града похвалы,/ юже днесь сошедшеся воспоем усердно:/ моли за верныя рабы,/ творящия приснорадостную и святую память твою.
Слава и ныне, Богородичен:
Напасти вражия отжени от душ наших, Богородице Всепетая,/ рождшая нам Спасение наше,/ темже всякий род человеческий поет тя,/ умная же воинства славят,/ яко Тобою Вышний к человеком сошел есть да вся привлечет с Собою,/ превозносящия неизреченное Твое рождество.
Песнь 4.
Ирмос: Услышах, Господи,/ смотрения Твоего таинство,/ разумех дела Твоя,// и прославих Твое Божество.
Веселия исполнися ныне, Нижеградская земле,/ имея себе на небесех предстательницу, Феодору чудную,/ молящуюся за вся, иже веру Христову в сердце слагают/ и прославляют Христово Божество.
Грядите, людие,/ воспойте песнь ныне Феодоре славней/ Евангельский образ смирения и любви нам явившей,/ юже поюще,/ прославим Христово Божество.
Рцыте Богови, коль дивны дела Его,/ Прославляющаго святыя Своя,/ в нихже Феодора Нижняго Нова града украшение,/ ныне восхваляется.
Богородичен: Аще и воспети Тя, Дево, потщимся усердно,/ но ни едино же слово довольно будет к пению милости Твоей,/ юже обильно на верныя рабы Своя изливаеши.
Песнь 5.
Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,// Человеколюбче.
День от дне в молитве пребывая,/ Слову Божию прилежа,/ многия дары духовныя стяжала еси, Феодоро,/ ихже и нам улучити потщися, молимся.
Волны жития в мире сем не возмогоша потопити корабль веры твоея, Феодоро,/ молитвою бо яко парусом движима была еси,/ пристанище тихое достигла еси.
Основася труды твоими и молении,/ обитель Пресвятыя Богородицы Зачатия честнаго,/ в нейже множество душ спасение улучити потщашася,/ сего ради тя воспеваем.
Богородичен: Сень смертная тя мимоиде, Дево,/ Сын бо Твой и Господь прият во святыя Своя и пречистыя руце душу Твою,/ с Ним же ныне тя достодолжно прославляем.
Песнь 6.
Ирмос: Молитву пролию ко Господу,/ и Тому возвещу печали моя,/ яко зол душа моя исполнися,/ и живот мой аду приближися,/ и молюся яко Иона:// от тли, Боже, возведи мя.
Притекают к образу твоему, Феодоро славная,/ архиереи и священницы,/ монаси и иноков множество,/ приемлюще помощь молитвами твоими.
Ева древле преслушанием клятву роду человеческому обрете,/ послушанием же Девы Спасение прииде,/ Ейже в житии подражати потщалася еси,/ Феодоро преславная.
Вышним силам подобяся,/ песнопении и бдении Сыну Божию послужити сподобилася еси, Феодоро,/ сего ради и ныне вкупе со святыми женами прославляешися.
Богородичен: Альфу и Омегу, Начало и Конец,/ миру всему источила еси, Богородице,/ безсеменно во чреве приявши,/ темже все умное ангельское воинство поет Тя.
Кондак святыя, глас 8:
Чистотою жития твоего Богу угодила еси,/ дары духовными обильно обогатилася еси,/ сего ради ныне с лики святых купно прославляешися, Феодоро,/ Нижняго Нова града похвало и утверждение.
Икос:
Измлада житие богоугодно совершая,/ Евангельския заповеди воплотила еси,/ супружества честнаго пример всем верным явивши/ последи же и иноческаго образа сподобилася еси, преподобная мати,/ сего ради зовем ти:/ радуйся земли Тверския честное прозябение,/ радуйся, князей российских преславное украшение,/ радуйся, кадило молитвы благовонное,/ радуйся Евангельскаго жития образе./ Радуйся, Феодоро Нижняго Нова града похвало и утверждение.
Песнь 7.
Ирмос: От Иудеи дошедше отроцы,/ в Вавилоне иногда,/ верою Троическою пламень пещный попраша, поюще:// отцев Боже, благословен еси.
Еще молимся ти, Феодоро прехвальная,/ да сохраниши ны невредимы от всех навет вражиих,/ ограждая святыми и благомощными молитвами к Богу.
Тя яко крин красный и яко шипок изящный обретохом, вернии,/ и твоими молитвами град наш утверждается,/ людие его от бед избавляются/ и вера православная в народе нашем возрождается.
Тьмы ангел ныне зриши лицем к лицу, Феодоро,/ на земли бесплотных житию поревновавши,/ в пощениих многащи пребывая,/ молитвы никакоже оставляла еси,/ сего ради тя вси величаем.
Богородичен: Якоже красная палата Царя твари явилася еси, Чистая,/ в рождестве девство сохраньши/ и во успении мира не оставльши.
Песнь 8.
Ирмос: Царя Небеснаго,/ Егоже поют вои ангельстии,// хвалите и превозносите во вся веки.
Феодору ныне ублажаем,/ поюще ея многия труды и подвиги,/ имиже воинством ангельским уподобися.
Егоже поют вои ангельстии,/ возлюбила еси паче всего красного, еже в мире сем,/ превозносящи во вся веки.
Одержимыя духом гордости и тщеславия ны,/ молитвами твоими очистити просим, Феодоро,/ превозносящи Христа во вся веки.
Богородичен: Древняго осуждения разрушение порождши, Дево,/ моли Господа и Творца Твоего,/ Егоже во чреве прияла еси,/ да спасет люди,/ превозносящия Его во вся веки.
Песнь 9.
Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с безплотными лики Тя величающе.
Отцу Небесному послужити в житии тщася/ воистину вся красная мира сего яко уметы вменила еси, Феодоро,/ словесы Божественными наслаждаяся/ иноческаго жития правило явилася еси.
Род князей Нижеградских тобою украшается,/ верныя люди утешение обретают,/ иноцы и священницы ревности по Бозе почерпают,/ сего ради с бесплотными лики тя величаем.
Богородичен: Образы древле видимыми разумехом безсеменное рождество Твое, Дево,/ Тя бо пророцы проповедаша, Мати Живота всех,/ Егоже во чреве прияла еси/ во спасение душ наших.
Светилен:
Свет сый Христе, просвети вся ны,/ поющия угодницу Твою, Феодору преславную.
Слава и ныне, Богородичен:
Пою благодать Твою, Дево,/ славлю и величия Твоя, Чистая,/ песнословлю и Рождество Твое:/ слава Тебе, скорая Помощнице и Спасение, и Утешение наше.
На хвалитех стихиры, глас 4:
Приидите, вернии,/ честному образу Феодоры поклонимся,/ почитающе подвиги ея и болезни,/ имиже благодать Духа святаго стяжавши,/ юже обильно и нам подает,// почитающим честную ея память.
Феодоро прехвальная,/ преподобных украшение,/ супруг честное удобрение,/ прииди стани с нами,/ в нарочитый день твоего торжества,/ подающи мир и велию милость// почитающим честную твою память.
Князей Нижеградских сословие тобою хвалится,/ Феодоро преславная,/ имея тя яко драгоценный сосуд,/ любовь Христову вместившую,/ юже и нам даровати молися,// почитающим честную твою память.
Лик святых ангел/ и благочестивых жен совокупление,/ монашествующих чин и людий православных составление,/ днесь купно с нами воспевает тя, Феодоро чудная,/ подающая мир и велию милость// почитающим честную твою память.
Слава, глас 7:
Радуйся, княгине славная,/ мирския суеты отвергшаяся,/ и от преподобного Дионисия во ангелский образ облекшаяся,/ многия жены вере Христовой научившая,/ радуйся, мати преблаженная,/ ангелов сожительнице и преподобных собеседнице,// радуйся Феодоро богомудрая.
И ныне, Богородичен:
Радуйся, Солнца Правды облаче,/ и неизреченнаго рождества виновнице,/ радуйся всесветлая свеще,/ радуйся стамно манны,/ Тобою бо Ева от клятвы избавися/ и род человеческий Спасителя приемлет,/ Егоже молити не оскудевай о празднующих// честную память Феодоры богоблаженныя.
На литургии:
Блаженна от канона песнь 3 и 6. Прокимен, глас 4: Дивен Бог во святых Своих, Бог Израилев. Стих: В Церквах благословите Бога, Господа от источник Израилевых. Апостол от послания к Галатом, зачало 208. Аллилуиарий, глас 1: Терпя потерпех Господа и внят ми и услыша молитву мою. Стих: Постави на камени нозе мои и исправи стопы моя. Евангелие от Луки, зачало 33. Причастен: В память вечную:
Молитва ко святей преподобной Феодоре Нижеградской
О святая преподобная мати наша Феодоро! К тебе в твой честный праздник стекшеся припадаем и молимся: не забуди нас, чад твоих, во святых и благомощных молитвах к Богу, Егоже заповеди в житии твоем воплотила еси и словесы Его в сердце своем сложила еси. Моли даровати нам грехов прощение, жития исправления, пути Христовых заповедедей шествие беспреткновенно соделати. Да вси купно прославим Прославльшаго тя Господа, во Святей Троице покланяемаго, Отца и Сына и Святаго Духа ныне и присно, и во веки веков. Аминь.
